اپریل فول(افسانچے)

 

اپریل فول

 محمد جمیل اختر جلیلی ندوی

   راحیل اپنے دوستوں کے ساتھ خوشگپیوں میں مشغول تھا کہ اچانک موبائل کی رنگ ہوئی، پڑوس کی آنٹی کی بیٹی تھی، چھوٹتے ہی کہا: جلدی سے آؤ، تمہاری ممی کی طبیعت بہت خراب ہے، راحیل دوستوں کویہ خبردیتے ہوئے جھٹ سے اٹھا؛ لیکن دوستوں نے آگاہ کیاکہ آج فرسٹ اپریل ہے، راحیل جھٹکے کے ساتھ بیٹھ گیااورخوش گپیوں میں مشغول ہوگیا، اِدھرماں زندگی کی جنگ لڑتے لڑتے ہارگئی، جب راحیل گھرپہنچاتوپیروں تلے سے زمین نکلتی ہوئی محسوس ہوئی، گھرمیں کہرام بپاتھا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اپریل فول

 محمد جمیل اختر جلیلی ندوی

    ٹرن…ٹرن…ٹرن کی آواز سن کرراکیش نے ریسیور کان سے لگایا، اپنے دوست راجوکی آواز سن خوش ہوگیا، خوشی کوسمیٹنے کی کوشش ہی کررہاتھا کہ ریسیوراس کے ہاتھ سے جھوٹ گرااوروہ بھاگابھاگا اوپر کے کمرے میں بندہوگیا، روتارہاروتارہا، بالآخرپنکھے سے جھولنے میں ہی عافیت سمجھی، راجوکوجب اس کی خبرہوئی توسر پکڑکربیٹھ گیا، اس کے ہاتھوں کے طوطے اڑگئے، وہ سوچ بھی نہیں سکتاتھاکہ اپریل فول کی مناسبت سے دی گئی فیل ہونے کی ایک جھوٹی خبراس کے پیارے دوست کی جان تک لے سکتی ہے۔