قانون مجرم کی پشت پناہی کے لئے یاسزاکے لئے؟

قانون مجرم کی پشت پناہی کے لئے یاسزاکے لئے؟

محمد جمیل اختر جلیلی ندوی

کتابوں میں قانون کی تعریف Law is nothing but common sense  کے الفاظ سے کی گئی ہے، جس کامطلب ہے کہ قانون عقل سلیم کے علاوہ کچھ نہیں، قانون کاتعلق ایک سے زائدافراد سے ہوتاہے؛ اس لئے ان تمام افرادکے عمومی رجحانات کوسامنے رکھتے ہوئے قانون ایسابنایاجاتاہے، جس سے کسی کوکوئی تکلیف نہ ہو اورعقل میں آسکے، اگرکسی کوتکلیف ہویاعقل میں نہ آسکے تواس کاصاف مطلب ہے کہ قانون میں جھول ہے، اس پرپھرسے غوروفکرکرنے کی ضرورت ہے، اس وقت بات اس پرنہیں؛ بل کہ اس پرکرنی ہے کہ قانون ہوتاہے کیاہے اوراس کامقصد کیاہے؟ یہ دراصل اجتماعی اصولوں پرمشتمل ایک ایسانظام ہوتاہے، جوملکی سطح پرحکومت کی جانب سے سماج اورمعاشرہ کومنظم اورمربوط کرنے کے لئے نافذکیاجاتاہے، اوراس کے لئے جب جتنی ضرورت پڑے ، طاقت کوبھی بروئے کارلایاجاتاہے۔
قانون کی حقیقت اوراس کامقصد تو یہ ہے؛ لیکن آج کے دور میں حکومتیں چوں کہ عموماًغیرمنصف ہوتی ہیں، اپنے خلاف سننا پسندنہیں کرتیں؛ بل کہ حق بات ہی کوسننے سے وہ انکار کرتی ہیں، جس کی وجہ سے وہ قانون بھی ایسے بنانے کی کوشش کرتی ہیں، جویاتوعقل سلیم کے خلاف ہوتے ہیں یاپھرجن کی وجہ سے بہت سارے افراد کوتکلیف ہوتی ہے، کچھ ہی ایام قبل کی بات ہے کہ ہمارے ملک میں Live in relationship کے جواز پرقانونی مہرلگایاگیا، امریکہ ، فرانس، برطانیہ ، چین وغیرہ جیسے ممالک میں، جن کادعوی ہے کہ وہ امن کے علم بردارہیں، سیکولرذہنیت کے حامل ہیں، وہاں مختلف اوقات میں متعدد ایسے قانون بنائے جاتے رہے ہیں، جن کی وجہ سے فسادات بھی پھوٹ پڑے ہیں، سعودی عرب میں متعدد ایسے قانون بنائے گئے ہیں، جونہ صرف یہ کہ عقل سلیم کے خلاف ہیں؛ بل کہ شریعت بھی ان کی اجازت نہیں دیتی۔
حکومتوں کی یہ حرکتیں اپنے مفادات کوسامنے رکھتے ہوئے ہوتی ہیں، اگرحکومتیں منصف مزاج ہوں توپھرایسی حرکتیں ان سے سرزدنہیں ہوں گی؛ لیکن ظاہرہے کہ آج کے دور میں اس کی تلاش ایسے ہی ہے، جیسے جنگل میں سانپ کی منی تلاش کی جائے ، نتیجہ ظاہرہے کہ ملک انارکی کاشکارہوجاتاہے، قانون توہوتاہے؛ لیکن قانون کے نام پرکہیں ظلم وزیادتی کی جاتی ہے اورکہیں قانون کی دھجیاں بھی اڑائی جاتی ہیں، قانون ہمیشہ ایساہوناچاہئے، جوملک میں رہنے والے کسی فرد کے لئے ناممکن العمل نہ ہو، ایساقانون بنانے کے لئے دماغ سوزی کی ضرورت پڑے گی اوراس کے ساتھ ایسے انسان کاہونابھی ضروری ہے، جومعتدل مزاج ہو،تب جاکرایساقانون بن سکتاہے،پھر جب ایسا قانون بن جائے  تواس کونافذ کرنے کی کوشش کرنی چاہئے، اس قانون کے دائرہ میں پھرتمام افرادکولاناچاہئے، ایسانہ ہوکہ آپ کی پارٹی والے تواس قانون کی گرفت میں نہ آئیں اوردیگرپارٹی کے لوگوں کوزبردستی اس قانون کے تحت گرفتار کیا جائے، اگرایساہونے لگے توملک سلامت روی کے ساتھ ترقی کرتارہے گا، ورنہ پھرملک کاتواللہ ہی حافظ ہے۔
ہمارے ملک بھارت میں کئی ایسے قانون بنے، جس کی وجہ سے بہت سارے افرادکوسڑکوں پر اترناپڑا،مطلقہ کاتانکاح ثانی نان ونفقہ، تین طلاق،سی اے اے وغیرہ اورزرعی قوانین کے سلسلہ میں توآج بھی لوگ سڑکوں پربیٹھے ہوئے ہیں، ان احتجاجات سے یہ واضح ہے کہ یہ قوانین ایسے ہیں، جن میں صرف اورصرف حکومت نے اپنے مفادات کوسامنے رکھاہے، اگرلوگوں کے مفادات کوسامنے رکھاجاتا تو پھرلوگوں کے لحاظ سے ایسے قوانین بنائے جاتے، جس کی وجہ سے سڑکوں پرلوگوں کو آنے کی ضرورت نہیں پڑتی، ایک طرف یہ حال ہے ہماری حکومت کی۔
دوسری طرف قانون کی دھجیاں اڑائی جارہی ہیں اورحکومت ان کے خلاف کچھ بھی نہیں کررہی ہے، محسن شیخ کی لنچنگ ہوئی دوہزارچودہ میں، پھرتوایک سلسلہ چل پڑا، جوآج بھی رکنے کانام نہیں لے رہاہے، اس کی وجہ ظاہرہے کہ براہ راست حکومت ہے اورسوال اسی سے ہوگا؛ کیوں کہ اس کے پاس طاقت ہے، اس کے پاس پولیس اورہوائی، بری اوربحری افواج ہے، وہ روکناچاہے تو فوراً روکاجاسکتاہے؛ لیکن افسوس! حکومت یاتوجان بوجھ کراپنے فائدہ کوسامنے رکھتے ہوئے مجرموں کوچھوٹ دے رہی ہے یاپھرحکومت جس طرح تمام شعبوں میں ناکام ہے، اسی طرح لاء اینڈ آرڈرکے شعبہ میں بھی ناکام ہے، خواہ وہ اس کااعتراف کرے یانہ کرے؛ لیکن واقعات اس ناکامی کی گواہی دے رہے ہیں۔
قانون اسی لئے ہوتاہے کہ نظام کودرست رکھاجاسکے، عدالت کے مسائل کوعدالت میں حل کیاجائے، پولیس اسٹیشن کے مسائل وہیں حل ہوں؛ لیکن بدقسمتی سے ملک کے کچھ افرادنے قانون کواپنے گھرکی لونڈی سمجھ رکھاہے، خودساختہ تنظیمیں وجود میں آتی ہیں اورمختلف ناموں کااستعمال کرتے ہوئے قانون کادھجیاں اڑاتی ہیں، جس کی سب سے اہم وجہ ایسے افرادکی طرف سے حکومت کی آناکانی ہے؛ بل کہ بعض موقعوں سے یہ بھی دیکھاگیاہے کہ حکومت کے ذمہ دارلوگ ایسے افرادکی پیٹھ ٹھونکتے ہیں، جواس طرح قانون کی دھجیاں اڑاتے ہیں، حکومت کوسمجھناچاہئے کہ مجرم مجرم ہی ہوتاہے، بالکل اسی طرح، جس طرح شیرشیرہوتاہے، جب تک اسے نوالہ ملتارہے، اوراس کاپیٹ بھرارہے، اس وقت تک وہ دم ہلاتا رہتاہے؛ لیکن جب نوالہ ملنا بندہوجائے توپھروہ اسی کواپنانوالہ بنالیتاہے، جوروزاسے نوالہ دیاکرتاتھا، یہی حال مجرمین کاہوتاہے، جب تک نوالہ ملے گا، وہ ٹھیک رہیں گے اورآپ کے آگے پیچھے دم ہلائیں گے، جیسے ہی آپ کی طرف سے نوالہ بندہوا، یاآپ سے زیادہ خوارک کسی نے دیا، بس وہ آپ ہی کوٹپکا کر چھوڑیں گے۔
دنیاکی آنکھ نے اس طرح کی کئی مثالیں دیکھی ہے، خود اس ملک کے کئی سیاسی رہنماؤں کے ساتھ ایساہوچکاہے کہ خود اسی کے باڈی گارڈ نے اسے گولیوں سے بھون دیاہے؛ اس لئے مجرموں کی پشت پناہی کی بجائے ان کوکیفرکردارتک پہنچاناحکومت کامقصدہوناچاہئے، نہ کہ اس کی پشت پناہی، ورنہ یہ بات یادرکھنے کی ہے کہ عوام ایک مدت تک ظلم کوبرداشت کرتی ہے، جب پانی سرسے اونچاہوجاتاہے تو پھر تخت وتاج کووہ اچھال دیتی ہے، عرب کے کئی ملکوں میں اس کے نمونے دیکھے جاچکے ہیں، اس ملک کے کئی پڑوسی ممالک میں بھی ایسی صورت پیداہوچکی ہے، بعض ملکوں میں توفوجی انقلاب بھی برپاہوچکاہے، آج برماکی حالت دیکھئے، جوکل نہتی عوام پرگولی چلوارہی تھی، آج وہ خودسلاخوں کے پیچھے ہے، ہمارے ملک میں ایسی نوبت تونہیں آئی ہے اورامیدہے کہ ایسی نوبت نہیں آئے گی؛ لیکن اس کامطلب یہ نہیں ہے کہ مجرمین کوکھلے سانڈ کی طرح چھوڑ دیاجائے کہ وہ جوچاہیں کرتے بھریں؟ اس سے توپھرلاء اینڈ آرڈرکامسئلہ پیداہوگا، اس پرقدغن لگانے کی ضرورت ہے۔
کل ہی ایک ویڈیودیکھنے میں آئی کہ ایک بزرگ شخص کوکچھ نوجوان مارپیٹ کررہے ہیں، پھراس کی داڑھی بھی کتردی جاتی ہے اورعجیب بات یہ ہے کہ یہ حرکت کرنے  والے ویڈیوبھی بنارہے ہیں اور اسے وائرل بھی کررہے ہیں، ظاہرہے کہ مجرمین کوایسی جرأ ت کہاں سے ملی؟ یہ حکومت کی پشت پناہی سے ہی توآئی ہے؟ اس کامقصدایک توایک طبقہ کے اندرڈرپیداکرناہے اوردوسرا یہ بھی بتاناہے کہ ہم قانون کونہیں مانتے ہیں یایہ کہ قانون ہماراکچھ نہیں بگاڑسکتا، یہ کھلے عام حکومت کوچیلینج کرناہے، بشرطیکہ حکومت اسے سمجھ سکے ؛ لیکن اگروہ نہ سمجھے یاسمجھ کرنظرانداز کردے توہم تویہی کہیں گے کہ ’’سمجھ سمجھ کرجونہ سمجھے، مری سمجھ میں وہ ناسمجھ ہے‘‘۔
اس واقعہ کی جس قدر مذمت کی جائے، وہ کم ہے، اس سے یہ بات بھی سمجھ میں آرہی ہے کہ نئی نسل کوکس قدربگاڑدیاگیاہے کہ وہ بزرگوں کی قدربھول گئی ہے، ایک بزرگ کے ساتھ مارپیٹ،بدتمیزی اورپھران کی داڑھی کاٹنا، یقینا یہ پود آئندہ کے لئے اپنے لئے، اپنے خاندان کے لئے اوراپنے ملک کے لئے نقصان دہ ہے، ان جیسے جوانوں سے ملک کوادنی فائدہ ہونے والا نہیں، ان سے صرف ملک کونقصان ہی ہوگا،اوریہ توحکومت جانتی ہے؛ بل کہ اگراس کے نظریات کامطالعہ کریں توصاف سمجھ میں آئے گاکہ وہ نسل ہی ایسی تیارکررہے ہی، جوآدراورسمان لفظ سے واقف نہ ہو، جن کے دلوں میں نفرت بھری جارہی ہے؛ لیکن ماں باپ کوتویہ سوچنے کی ضرورت ہے کہ جس بچے کے لئے اتنے جوکھم اٹھائے، کیاوہ اسی دن کے لئے تھے کہ وہ مان سمان بھول جائے؟ اورجب باہرکے لوگوں کے ساتھ اس کامان سمان نہیں ہے تواپنے گھرمیں کہاں سے ہوسکتاہے؟ یہ سوچنے کی ضرورت ہے۔
سیاسی پارٹیوں اورملی تنظیموں کوبھی اس طرف توجہ دینے کی ضرورت ہے کہ ملک کے اس کونہ سے لے کراس کونہ تک کہیں نہ کہیں اس طرح کے واقعات آئے دن پیش آتے رہتے ہیں، کیاان کے خلاف آواز اٹھانے کی ضرورت نہیں ہے؟ ان جیسے واقعات کی روک تھام کے لئے کس طرح کے اقدام ضروری ہیں؟ اسے فوری طورپرعمل میں لاناچاہئے؛ تاکہ ہماری نسل بھی خراب نہ ہواوراس طرح کے واقعات بھی رونمانہ ہوں۔jamiljh04@gmail.com

جمہوریت کی لاش پہ طاقت ہے خندہ زن

جمہوریت کی لاش پہ طاقت ہے خندہ زن

محمدجمیل اخترجلیلی ندوی

بھارت کاوجودایک جمہوری ملک کے طورپر1947ء میں ہواتھااور1949ء کوتمام بھارتیوں کویہ حلف دلایاگیاتھا کہ’’ہم بھارت کے عوام متانت وسنجیدگی سے عزم کرتے ہیں کہ بھارت کوایک مقتدرسماج وادی غیرمذہبی عوامی جمہوریہ بنائیں اوراس کے تمام شہریوں کے لئے حاصل کریں: انصاف، سماجی، معاشی اور سیاسی آزادی خیال، اظہار، عقیدہ، دین اورعبادت، مساوات بہ اعتبار حیثیت اورموقع اوران سب میں ترقی دیں، جس سے فرد کی عظمت اورقوم کے اتحاد اورسا  لمیت کاتیقن ہو، اپنی آئین ساز اسمبلی میں آج 26؍نومبر 1949ء کویہ آئین ذریعہ ہذااختیارکرتے ہیں، وضع کرتے ہیں اوراپنے آپ پرنافذ کرتے ہیں‘‘۔
لیکن افسوس کے ساتھ یہ لکھناپڑرہاہے کہ ابھی اس عہداورحلف کے سوسال بھی پورے نہیں ہوئے ہیں کہ ہم سب خلاف ورزی پراترآئیں ہیں، کوئی کم توکوئی زیادہ؛ کیوں کہ ملک کی سا لمیت اورترقی کے لئے ہم تمام لوگوں نے عزم کیاتھا، اب ہرفردیہ سوچے کہ وہ اپنے اس عزم پرکس حدتک قائم ہے؟ آج اگرایک طبقہ ملک کے کچھ لوگوں پر زیادتی کررہاہے تودیگرلوگ کیاکررہے ہیں؟ اس زیادتی کوبرداشت کیوں کررہے ہیں؟ کیااس زیادتی کی وجہ سے ملک کی سا لمیت باقی رہے گی اورکیاملک کی ترقی ہوگی؟ ظاہرہے کہ نہیں؛ کیوں کہ اس ملک کی خصوصیت ہی گنگا جمنی تہذیب ہے تواس کی ترقی اس تہذیب کوختم کرکے کیسے ممکن ہوسکتی ہے؟
لیکن سوال یہ ہے کہ جب ایک طبقہ زیادتی پراترتاہے توہم کھڑے تماشائی بن کرکیوں دیکھتے ہیں؟ کیاہم پرضروری نہیں ہے کہ ہم اس زیادتی کرنے والوں کے ہاتھ پکڑیں؟ کیاہم سب نے مل کریہ عزم نہیں کیاہے کہ اس ملک میں اخوت اوربھائی چارگی کوترقی دیں گے؟ توپھرہم کیوں اس زیادتی کے خلاف نہیں کھڑے ہوتے؟ ہم تماش بین کیوں بن جاتے ہیں؟ یادرکھئے! جب زیادتی کرنے والے کوڈھیل دی جاتی ہے تواس کادائرہ وسیع سے وسیع ترہوتاجاتاہے، اس کے اندرغرورآجاتاہے، تکبرآجاتاہے اوروہ خود  کے بارے میں یہ تصورکرنے لگتاہے کہ ہم سے کوئی ٹکرنہیں لے سکتا، پھروہ کمزوروں سے آگے بڑھ کر اپنے برابروالوں سے بھی پنجہ آزمائی شروع کردیتاہے۔
یہ ایک حقیقت ہے کہ جس طرح ظلم کرناگناہ ہے، اسی طرح ظلم سہنابھی ایک وقت کے بعدگناہ ہے؛ کیوں کہ اگرظلم سہنے کوشیوہ بنالیاجائے توپھررفتہ رفتہ بزدلی آجاتی ہے، بنی اسرائیل کی مثال اس تعلق سے بالکل واضح ہے، ظلم سہتے سہتے وہ قوم بزدل ہوگئی تھی اورکسی طورجنگ کے لئے تیارنہیں ہوتی، اسی لئے جب انھیں ایک نافرمان قوم سے جنگ کاحکم دیاگیاتوانھوں نے حضرت موسیٰ علیہ السلام کوجواب دیا کہ آپ اپنے رب کے ساتھ جائیں اورجنگ کریں، ہم تو یہیں بیٹھے رہیں گے، اس جملے میں ان کی سرکشی بھی پائی جارہی ہے؛ لیکن ساتھ میں بزدلی بھی موجودہے۔
نبوت ملنے کے بعدمکہ میں توظالموں کے ظلم کوبرداشت کرنے کاحکم دیاگیا؛ لیکن مدینہ میں ظلم سہنے کانہیں ؛ بل کہ ظلم سے مقابلہ کاحکم دیاگیا، اگرمدینہ میں بھی ظلم کوبرداشت کیاجاتارہتا توخودسوچئے کہ کیااسلام کادائرہ اتناوسیع ہوتا، جتناہوا؟ مکہ فتح ہوتا؟ اورکیامکہ کے لوگ اسلام میں داخل ہوتے؟ انسانیت کاوہ درس دنیاکے سامنے آپاتا، جوآیا؟ اخوت وبھائی چارگی کاوہ نمونہ دنیادیکھتی، جواسے دیکھنے کوملی؟مظلوموں کوتسلی ملتی، جوملی؟ ظالم کاسرنیچاہوتا، جوہوا؟ظالموں کوسبق ملتا، جوملا؟ دنیاکاقانون بھی یہی ہے کہ ایک مدت کے بعدظلم کامقابلہ ضروری ہے؛ بل کہ اگراس وقت کی دنیاکامطالعہ کریں توبات سمجھ میں آئے گی کہ آج کادورظلم کے برداشت کادورنہیں ہے؛ بل کہ جس طرح حکم اس بات کادیاگیا ہے کہ کہ موذی کوایذاپہنچانے سے قبل ہی مارڈالو، اسی طرح آج کادورہے، ظالم کوظلم کرنے سے پہلے مٹادیناچاہئے، ورنہ ظالم کی طرف سے ایسی تباہی ہوتی ہے کہ بعد میں سوائے افسوس کے کچھ ہاتھ نہیں آتا، ہیروشیمااورناگاساکی ظلم کی انتہاکی مثال ہے کہ آج بھی وہاں بچوں کی پیدائش صحیح سالم نہیں ہوتی، جسمانی اعتبارسے کچھ نہ کچھ نقص پایا جاتا ہے، عراق کومکمل طورپرتباہ کردیاگیا، بعدمیں ’’سوری‘‘ کہہ دیاگیا کہ غلطی ہوگئی تھی، افغانستان کوبربادکردیاگیا، اب جاکرصلح صفائی کی گئی، ابھی حال میں غزہ کوتہس نہس کردیاگیا، بعد میں جنگ بندی کی گئی، اب تعمیرنو کی بات کی جارہی ہے۔

یہ سب مثالیں ہیں، جوہمارے سامنے ہیں، ان کے علاوہ دن ورات میں کتنی مثالیں اس کی ہمیں مل جاتی ہیں خود اپنے ملک میں؛ لیکن ہم ان کی طرف توجہ نہیں دیتے، اوریہ آج سے نہیں ہورہاہے؛ بل کہ ایک مدت سے یہ سب چلتاچلاآرہاہے، بھارت کی تاریخ میں فسادات کاایک لمباسلسلہ ہے، جوتقریباتمام کے تمام کانگریس کی قیادت میں انجام دئے گئے؛ لیکن یہ عجیب بات ہے کہ ہم اسی کے دم چھلے بن کررہے اورآج بھی اس کوچھوڑنے کے لئے تیارنہیں، ہم جس کی وجہ سے بیمارہوئے، اسی کے پاس دوا تلاشتے رہے، ہمیں جومارتارہا، ہم اسی سے پناہ مانگتے رہے، جو سانپ ہمیں ڈستارہا، ہم اسی کودودھ پلاتے رہے، آج اسی کانتیجہ ہمارے سامنے ہے۔
اگرہم ظلم کامقابلہ کرتے رہتے توآج ہماری حالت ویسی نہیں ہوتی، جوآج اپنے ہی ملک میں ہے، ظلم سہتے سہتے اب ہم بزدل ہوچکے ہیں، ہمارے ساتھ کچھ بھی ہوجاتا ہے، ہم جوش میں تھوڑاچلاتے چیختے ہیں، پھرٹھنڈے پڑجاتے ہیں، فسادات کی اتنی تعدادویسے ہی تھوڑے وجود میں آئی ہے؟ ظلم سہنے اوربرداشت کرنے کے نتیجہ میں اتنی تعداد وجودمیں آئی ہے، پھراس کے بعد قانونی کارروائی بھی ہماری طرف سے خاطرخواہ نہیں ہوپاتی، یہی وجہ ہے کہ آج بھی ہاشم پورہ کے لوگ انصاف کے منتظرہیں، اس ملک میں سکھ کے ساتھ بھی ایک زمانہ میں ظلم ہوا؛ لیکن اس کے بعدپھرکبھی نہیں سناگیا؛ کیوں؟ کیوں کہ انھوں نے اپنی طاقت کا مظاہرہ کیا، انھوں نے بتایاکہ ہم ظلم سہہ کررہنے والی قوم نہیں، نتیجہ یہ ہے کہ جن لوگوں نے سکھوں پرظلم کیا تھا، انھیں لوگوں نے اس قوم کواپنے سرکاتاج بنایا؛ بل کہ اس پروہ مجبورہوئے۔
دوہزارچودہ میں محسن شیخ کی لنچنگ کی گئی، اس پرہم نے خاطرخواہ ایکشن نہیں لیا، نتیجہ آپ کے سامنے ہے کہ ملک کے اس کونہ سے لے کراس کونہ تک لنچنگ کی ایک طویل فہرست وجودمیں آگئی، جوآج بھی رکنے کانام نہیں لے رہی ہے، جس وقت ہمارے ملک میں لنچنگ کابازارگرم تھا، ٹھیک اسی زمانہ میں ایک ویڈیووائرل ہوئی تھی، جس میں دکھایاگیا تھا کہ ایک سکھ ڈرائیورکے ساتھ کچھ لوگوں نے زیادتی کی کوشش کی تواس نے اینٹ کاجواب پتھرسے دیتے ہوئے اپنی گاڑی سے لاٹھی اورتلوارنکال لی، بس پھرکیاتھا، غنڈوں کی بھیڑ چھٹ گئی، یہ اس بات کی دلیل ہے کہ آج کی دنیامیں طاقت کامظاہرہ ضروری ہے، دنیاطاقت کے سامنے جھکتی ہے، خواہ وہ طاقت مالی ہو، جسمانی ہو، تعلیمی ہویا پھر اسلحہ جاتی ہو اورہمارا ملک تواس تعلق سے کافی آگے ہے، ہراس چیز کے سامنے جھکاجاتاہے؛ بل کہ سرجھکایاجاتاہے، جس کے اندرکسی بھی قسم کا نفع یانقصان پہنچانے کی صلاحیت ہو اوراس بات سے ہم سب واقف بھی ہیں؛ لیکن معلوم نہیں کہ اس کے باوجود آج تک ہم لوگوں کی توجہ اس طرف کیوں نہیں گئی؟
ماضی میں ہم نے کئی مواقع سے بھیڑ تواکھٹی کی ہے، چندمواقع پرفائدہ بھی ہواہے؛ لیکن اب اس بھیڑکافائدہ نہیں ہورہاہے؛ اس لئے ہمیں چال بدلنے کی ضرورت ہے، اب صرف بھیڑ جمع کرنے سے مسئلہ کاحل نہیں ہونے والا، یوں بھی بھیڑکے ذریعہ سے مسائل بہت زیادہ حل نہیں ہوتے، مسائل وقت کے حساب سے چال چلنے سے حل ہوتے ہیں، جنگ آزادی میں بکسروبنگال کی جنگوں میں بھارتیوں کوکیوں شکست ہوئی تھی؟ تعدادتوتھی؛ لیکن فریق مخالف کے لحاظ سے ہمارے پاس اسلحہ جات نہیں تھے، جنگ میں ترکوں کوجوشکست ہوئی، اس کی بھی ایک بڑی وجہ جدیداسلحہ جات کی کمی بتائی جاتی ہے، اگران کے پاس وقت کے لحاظ سے اسلحہ جات کی کھیپ تیارہوتی توشکست کاسامنا شاید نہیں کرناپڑتا؛ اس لئے ہم سب کوسرجوڑ کرسوچناچاہئے کہ ماضی کی کن کن غلطیوں کے نتیجہ میں ہماری طاقت ختم ہوگئی ہے؟ پھران غلطیوں کی اصلاح ضروری ہے، اگراب بھی اس کی طرف ہماری توجہ ہوجائے توبہت جلد ہم سراٹھاکرجینے کے قابل ہوجائیں گے، ورنہ اسی طرح ہم پرزیادتی کی جاتی رہے گی، جوآج رواہے؛ کیوں کہ کہنے کوتو یہ ملک جمہوری ملک ہے؛ لیکن حقیقت یہ ہے کہ :

جمہوریت کی لاش پہ طاقت ہے خندہ زن

اس برہنہ نظام میں ہر آدمی کی خیر

jamiljh04@gmail.com / Mob:8292017888

امریکی وزیرخارجہ کادورۂ مشرق وسطیٰ: جوڑ کی بجائے توڑ کی کوشش

امریکی وزیرخارجہ کادورۂ مشرق وسطیٰ: جوڑ کی بجائے توڑ کی کوشش

محمد جمیل اختر جلیلی ندوی

اس دنیامیں بہت ساری باتیں عجیب وغریب دیکھنے کوملتی ہیں، ایسی چیزیں ، جن کے بارے میں آپ کا تصورکچھ اورہوتاہے؛ لیکن وہ نکلتی کچھ اورہیں، انسانوں میں بھی ایسے بہت سارے ہیں، جن کے تعلق سے یہی چیز دیکھنے کوملتی ہے، ان کوہم سمجھتے کچھ ہیں اوروہ نکلتے کچھ ہیں، اس دنیامیں کچھ حکومتیں بھی ایسی ہی ہیں، جواپنے بارے میں بتاتی کچھ ہیں؛ لیکن کام وہ کچھ اورکرتی ہیں، گویا’’ہیں کواکب کچھ، نظرآتے ہیں کچھ‘‘ کے عملی نمونے۔
اس وقت دنیامیں جواپنے آپ کوعالمی طاقت کہلوانے پرتلے ہوئے ہیں، ان کی حرکتیں بھی انھیں عجیب وغریب اورمتضاد چیزوں پرمشتمل ہیں، جب وہ خود کسی پرحملہ آورہوتے ہیں توقیام امن کی لڑائی اسے قراردیتے ہیں، خواہ اس کی وجہ سے امن پارہ پارہ ہی کیوں نہ ہوجائے؟ لوگوں کی جانیں کتنی بھی چلی جائیں، اس سے انھیں کوئی مطلب نہیں، بموں کی بارش برساکرنہتے شہریوں کوہلاک کریں اوران کی رہائش گاہوں کوتباہ وبربادکریں، اس کے باوجودوہ امن پسند ہیں اورقیام امن کے لئے ہی ان کی لڑائی ہے، جب کہ جولوگ ان کی اس بے جاحرکت سے بیزارہوکراپنی دفاع کرنے کے لئے اٹھ کھڑے ہوں، تودہشت گرد بن جاتے ہیں، پوری دنیامیں ان دفاع کرنے والوں کے تعلق سے یہ ڈھنڈورا پیٹ دیاجاتاہے کہ وہ دہشت گرد ہیں، دنیاکی آنکھ نے اس کی بہت ساری مثالیں دیکھی ہیں، جن کے بیان کی ضرورت نہیں ہے۔
ابھی کچھ دنوں پہلے اسرائیل نے کوشش کی کہ شیخ جراح کی پوری بستی کوفلسطینیوں سے خالی کراکے وہاں یہودیوں کوآبادکردیاجائے، جس کے لئے اس نے شیخ جراح پرحملہ کردیا، نہتے فلسطینیوں کی مددکے لئے پوری دنیاکوکھڑا ہونا چاہئے تھا اوراسرائیل کوسرزنش کرنی چاہئے تھی؛ لیکن کسی کے کانوں میں جوں تک نہیں رینگی، اس کودیکھ کرحماس نے ان کی طرف سے دفاعی حملہ کیااوراس شدت کے ساتھ کیاکہ اسرائیل جنگ بندی پرمجبورہوا، حماس کے اس دفاعی کارروائی سے اسرائیل کی طاقت کاغرہ چکناچورہوگیا اوراس کاسب سے بڑا فائدہ یہ ہوا فلسطینی اتھاریٹی اورحماس کے مابین جاری چشمک ماند پڑگئی اوردونوں گویا دوسرے کے حلیف بن گئے، اسی کانتیجہ تھا کہ جب امام اقصیٰ نے خطبہ میں حماس کے ذکرسے گریز کیاتو فلسطینی اتھاریٹی کے جوانوں نے امام کومنبرسے کھینچ لیا، یہ واضح علامت تھی اس بات کی دونوں کے مابین چشمک ختم ہوگئی ہے، ظاہرہے کہ امن پسندی کے دعویداروں کویہ کیسے راس آسکتاتھا؟ ان کی تودلی خواہش یہ ہے کہ فلسطینی اورحماسی آپس میں مصالحت بالکل بھی نہ کریں ؛ بل کہ ان کے مابین کشمکش جاری رہے اورہم ’’امن پسند‘‘ اس کافائدہ اٹھاکر دونوں پرحملہ کرتے رہیں اوران کوجان سے بھی مارتے رہیں، ان کی معیشت بھی تباہ کرتے رہیں اورکی رہائشی عمارتوں کو بھی ملبہ میں بدلتے رہیں۔
یہ پلاننگ تو مسلمانوں کے خلاف صدیوں سے چلتی چلی آرہی ہے اورقائدین کواس تعلق سے سوچنے اورسمجھنے کی ذرا بھی مہلت نہیں دی جارہی ہے، اسی پلاننگ کے تحت اسرائیل اورحماس کی جنگ بندی کے فوراً بعد ’’انکل سام‘‘میدان میں اترگئے اوراپنے وزیرخارجہ انٹونی بلنکن کومشرق وسطیٰ کے دورہ پربھیج دیا، وزیرخارجہ انٹونی نے رملہ کا دورہ کیا اورنتن یاہوسے ملاقات کی؛ بل کہ اگلامنصوبہ سمجھایا، پھرفلسطینی اتھاریٹی کے صدرمحمودعباس سے ملاقات کی، اس کے بعدوہ مصرگئے اورسیسی کی پیٹھ تھپکی، پھراردن بھی گئے، ان علاقوں کادورہ کیا اوراس دورہ کانام’’جنگ بندی کومستحکم کرنے کے لئے علاقائی دورہ‘‘ رکھاگیا، اس دورہ میں اس نے یقین دہانی کرائی کہ اسرائیلی جارحیت میں جونقصان ہواہے، اس کی تعمیرنوکی جائے گی؛ تاہم اس یقین دہانی کے ساتھ ایک شوشہ بھی چھوڑدیاکہ اس تعمیرنوسے حماس کوالگ تھلگ رکھاجائے گا اوریہ تعمیرنوفلسطینی اتھاریٹی کے ذریعہ انجام دی جائے گی۔
اس شوشہ کی ضرورت بالکل بھی نہیں تھی؛ کیوں کہ یہ توپہلے سے طے ہے کہ تعمیرنوکے لئے جوبھی تعادن انکل سام کے توسط سے آئے گا، وہ حماس تک پہنچ ہی نہیں سکتا ہے؛ کیوں کہ ان کے نزدیک یہ تودہشت گرد تنظیم ہے اوران کی دہشت گردی کی آڑ لے کر نہتی عوام کوتومارا جاسکتا ہے، ان کی رہائشی عمارتوں کوملبہ میں بدلاجا سکتاہے؛ لیکن ان کوتعاون نہیں دیاجاسکتا، آپ غورکیجئے کہ اس جنگ کوبراہ راست حماس سے جوڑا گیا؛ لیکن اسرائیل کی طرف سے جوبھی حملے ہوئے، وہ کہاں ہوئے؟ اس صورت حال میں اسرائیل کوتوبین الاقوامی عدالت میں گھسیٹا جانا چاہئے کہ جب جنگ حماس سے چل رہی ہے تونہتے فلسطینیوں کے خلاف کارروائی کیوں کی جارہی ہے؟ انکل سام کواسرائیل کے وزیراعظم سے ملاقات کی بجائے پھٹکارلگانی چاہئے؛ لیکن وہ توخود ہی پلاننگ کرتاہے اوررنگ بھرائی اسرائیل سے کرواتاہے۔
پھرامریکی وزیرخارجہ کے دورہ کی عجیب بات یہ ہے کہ جنگ بندی حماس اوراسرائیل کے مابین ہوئی ہے، جس میں بتایاجاتاہے کہ ثالثی کارول مصرنے اداکیاہے، اب آپ خود سوچئے کہ جنگ بندی کومستحکم کرنے کے لئے وزیر خارجہ کوبات اورملاقات کس سے کرنی چاہئے؟ حماس اوراسرائیل کے درمیان یا اسرائیل، فلسطینی اتھاریٹی اورمصرواردن کے درمیان؟ یہ واضح طورپردال میں کالے والامعاملہ ہے، ایک طرف ان کا دعوی ہے کہ یہ جنگ حماس اوراسرائیل کے درمیان چل رہی تھی اوردوسری طرف جنگ بندی کا استحکام اسرائیل اوردیگرلوگوں سے کررہے ہیں، حماس کاذکرتک نہیں کیا؛ بل کہ الٹاایک شوشہ چھوڑدیاکہ غزہ کی تعمیرنومیں فلسطینی اتھاریٹی کوشامل کیاجائے گا، حماس کونہیں، انکل سام کے اس رویہ پراسی لئے حماس نے شدید تنقید کی ہے اوریہ بات بھی قابل غورہے کہ غزہ پرکنٹرول حماس کاہے اوروہاں انکل سام فلسطینی اتھاریٹی کوتعمیر نوذریعہ بنارہاہے، اس سے بات بالکل واضح ہے کہ فلسطینی اتھاریٹی اورحماس کے درمیان حالیہ جنگ کے نتیجہ میں جودوستی سامنے آئی ہے، وہ ان عالمی طاقتوں کوبرداشت نہیں ہورہاہے اوروہ اس بات کی کوشش میں لگ گئے ہیں کہ دونوں کے درمیان اسی طرح کی چشمک چلتی رہے، جوگزشتہ سالوں میں چلتی رہی ہے  اور’’پھوٹ ڈالو، حکومت کرو‘‘ توان کاہمیشہ سے شیوہ رہاہے، یہی چال یہاں چلی جارہی ہے۔
فلسطینی اتھاریٹی تواوسلومعاہدہ کے بعدسے ہی امریکہ کے اشارہ پرکام کرتی ہے؛ لیکن حالیہ جنگ کی وجہ سے عوام حماس کے ساتھ مل گئی ہے، جس کی ایک جھلک امام کومنبرسے اتارنے کے وقت دیکھنے کوملی، ایسی صورت میں انکل سام کی طرف سے جوتوڑنے کی کوشش ہورہی ہے، اسے سمجھنے کی ضرورت ہے اورخصوصیت کے ساتھ فلسطینی اتھاریٹی کویہ بات سمجھنی چاہئے ؛ کیوں کہ ایک توغزہ حماس کے زیرتسلط ہے ، دوسرے حماس نے اس جنگ میں ان کی کلی طورپرمددکی ہے اورتیسرے یہ کہ عوام بھی حماس کے ساتھ ہے، پھرحماسی وزیرنے یہ صاف بھی کردیاہے کہ تعاون کے طورپرملنے والا ایک پیسہ حماس یااس کی ملٹری ونگ کونہیں جائے گا، ایسے میں صدرمحمودعباس کوبہت سوچ سمجھ کرفیصلہ کرناہے کہ خطہ میں امن کوباقی رکھنے کے لئے حماس اورفلسطینی اتھاریٹی کی آپسی کشمکش نقصان دہ ہے، آپسی دوستی ہی ان کے حق میں مفید ہے اوراسی افادیت کوامریکہ اوراسرائیل نے حالیہ جنگ میں بھانپ لیاہے؛ اسی لئے امریکی وزیرخارجہ نے غزہ کی تعمیرنومیں شوشہ چھوڑ دیاکہ حماس کواس سے بالکل الگ تھلگ رکھاجائے گا، حماس نے بھی اس کاصحیح جواب دیا ، جودیاجاناچاہئے تھا۔jamiljh04@gmail.com / Mob:8292017888

تعاون کی ضرورت ہے اِن کوبھی!

تعاون کی ضرورت ہے اِن کوبھی!

محمدجمیل اخترجلیلی ندوی

دوہزار انیس کے آخری مہینوں میں شروع ہونے والے ’’کورنا ‘‘کی وجہ سے یوں توپوری دنیاپرغم والم کے پہاڑ ٹوٹے، جسم انسانی سے سانس کی ڈوراس طرح کٹی، جیسے مانجھےسے پتنگ کی ڈور کٹتی ہے، آبادیاں ویران ہوگئیں، گھراورخاندان اجڑگئے، معیشت تباہ وبرباردہوگئی، گزشتہ سال اموات کے تعلق سے بھارت کی وہ حالت نہیں تھی، جوامریکہ اوراٹلی وغیرہ تھی؛ لیکن اس سال ان ملکوں کے قریب قریب ہمارادیش پہنچ چکاہے۔
کوروناکی وجہ سے ہرشعبہ میں نقصان ہواہے اورنقصان بھی ایسا، جس کی بھرپائی شاید ممکن نہیں؛ لیکن سب سے زیادہ نقصان تعلیمی شعبہ میں ہواہے، جان کے اعتبارسے بھی، تعلیم کے لحاظ سے بھی اورمال کے اعتبارسے بھی، گزشتہ سال کے مقابلہ میں جان کے لحاظ سے اس سال زیادہ نقصان ہوا، ایک سے بڑھ ایک اساتذہ دنیاسے رخصت ہوگئے، ایک ایک یونیورسٹی میں پچاس پچاس سے زائد اساتذہ کی رحلت ہوئی، ظاہرہے کہ اس کی وجہ سے جوخسارہ تعلیمی شعبہ کاہواہے، اس کی بھرپائی کیسے ہوسکتی ہے؟ یونیورسٹیوں کے علاوہ مدارس، اسکولس اور کالجز کے اساتذہ کی بھی ایک بڑی تعداد دنیاسے رخصت ہوگئی، ان اساتذہ  کے جانے سے تعلیمی شعبہ واقعتا یتیم ہوگیاہے۔

تعلیمی اعتبارسے تواتنانقصان ہواہے کہ اس کااندازہ لگاپانامشکل ہے، اکثر طلبہ کی تعلیم ہی منقطع ہوگئی ہے، خواہ وہ اسکول کے ہوں یامدارس کے، خصوصیت کے ساتھ غریب اورمتوسط طبقات سے تعلق رکھنے والے طلبہ تعلیمی ڈگرسے ہٹ کرمعمولی کام کاج سے جڑگئے ہیں، اورظاہرہے کہ ملک کی اکثریت اسی طبقہ سے تعلق رکھتی ہے، رہے کچھ امیر اوردولت مندلوگ توان کے بچوں کی تعلیم آن لائن اگرچہ چل رہی ہے؛ لیکن یہ طریقۂ کار بھارت میں توکام چلاؤ کی حدتک ہے اورکام چلاؤ تعلیم کے طریقہ سے توکام چلاؤ تعلیم ہی حاصل ہوسکتی ہے، رہے مدارس توان کی ایک بڑی تعدادآن لائن تعلیم ہی کی قائل نہیں، کچھ نے آن لائن تعلیم شروع کررکھی ہے؛ لیکن مسئلہ یہ ہے کہ بہت سارے طلبہ کے پاس انرائڈ موبائل نہیں ہے، جس کی وجہ سے وہ اس طریقہ سے استفادہ نہیں کرپارہے ہیں۔
تعلیمی ادارے ایک سال سے بندہیں، تعلیم بھی نہیں ہوئی اورامتحانات بھی نہیں ہوئے، ظاہرہے کہ اس کی وجہ سے سال بھی بربادہوگااورحاصل بھی کچھ نہیں؛ اس لئے حکومتی سطح پریہ اعلان کیاگیاکہ طلبہ کوپرموٹ کردیاجائے گا، اس سے سال توبچ جائے گااورسرٹیفیکیٹ بھی مل جائے گی؛ لیکن صلاحیت اوراہلیت کہاں سے پیداہوگی؟ اس طریقہ کی مثال توایسے ہی ہے، جیسے پیسے دے کرسرٹیفیکیٹ حاصل کرلیاجائے، اس سے نقصان صرف بچہ کانہیں؛ بل کہ مستقبل میں بہت ساری چیزوں کاہوگا، پتہ نہیں ہماری حکومتوں کویہ کیوں سمجھ میں نہیں آیاکہ جس طرح گائڈ لائن دے کرتمام شعبہ جات کوکھول دیاگیا، اسی طرح تعلیمی اداروں کوبھی کھول دیاجائے؟ لیکن ہوایہ کہ کچھ کلاسیز توکھولے گئے؛ البتہ اکثرکلاسیز نہیں کھولے گئے، ایسی صورت میں خصوصیت کے ساتھ چھوٹے طلبہ ، جوتعلیمی راستے سے جڑے تھے، بالکل بھٹک گئے، کچھ لوگ ٹیوشن دلاکراپنے بچوں کے تعلیمی سلسلہ کوباقی ضرور رکھے ہوئے ہیں؛ لیکن بہرحال تعلیمی اداروں کاماحول تونہیں دیا جاسکتا ہے نا اوراس کانقصان بڑانقصان ہے۔
مالی لحاظ سے بھی سب سے زیادہ نقصان اسی شعبہ کوہواہے، جوتعلیمی ادارے حکومتی ہیں، ان کے توبلّے بلّے ہیں، اساتذہ بھی ماشاء اللہ خوش حال ہیں؛ لیکن جوادارے غیرسرکاری ہیں، ان کوکافی نقصان ہواہے، بڑے اداروں کوکچھ کم نقصان ہوا؛ لیکن جوچھوٹے ادارے ہیں، وہ بالکل خسارہ میں رہے، ہزاروں اسکول توبند ہی ہوگئے، جوباقی رہے، وہ لاچاری کی حالت میں ہیں، ان کے اساتذہ بھی لاچارہیں، کچھ اساتذہ توٹیوشن سے کام چلالیتے ہیں؛ لیکن ایک بڑی تعدادایسی ہے، جن کے پاس کوئی ٹیوشن نہیں، ان بے چاروں کی حالت خستہ ہے، اورسب سے زیادہ خستہ حال مدارس کے اساتذہ ہیں، خصوصیت کے ساتھ چھوٹے اورشخصی مدارس کے اساتذہ کی حالت، ان کی اکثریت ایسی ہے، جن کی پشت پرگھریلوسپورٹ نہیں ہے، سال بھرسے زیادہ عرصہ ہوگیا، مدارس سے ان کوتنخواہیں نہیں ملی ہیں، کچھ اساتذہ جیسے تیسے چندہ کرکے سال بھرسے گزارہ کررہے ہیں، کچھ قرض اوراداھارکے سہارے زندگی گزاررہے ہیں؛ لیکن یہ سہارے آخرکب تک کام آئیں گے؟ 
اس وقت مساجدمیں بھی جگہیں خالی نہیں ہیں اوراگرکہیں خالی بھی ہے جگہ توکمیٹی والے پانچ لوگوں کی خاطرامام بحال کرنے کے روادارنہیں، پھربعض مدارس کے ذمہ دار توایسے ہیں کہ سال بھرسے اپنے اساتذہ کی خیریت تک نہیں پوچھی، حالاں کہ یہ اخلاقی فرض تھا، یہ بات توماننے کی ہے کہ کچھ مدارس ایسے ہیں، جن کے پاس اساتذہ کودینے کے لئے پیسے نہ ہوں؛ لیکن اکثرمدارس ایسے ہیں، جن کے پاس پوری تنخواہ نہ سہی؛ لیکن سدرمق کے بقدرتنخواہ دینے کی طاقت ضرور ہے، ایسے مدارس کے ذمہ داروں پرفرض تھاکہ وہ اپنے اساتذہ کی فکرکرتے؛ لیکن ایسانہیں ہوا۔
یہ اساتذہ ایسے بھی نہیں ہیں کہ وہ گاؤں اورمحلہ میں تقسیم ہونے والی خیراتی لائن میں لگ جائیں اورچوں کہ ان کارہن سہن معاشرہ میں ٹھیک ٹھاک ہی رہتاہے؛ اس لئے سماج کے لوگ انھیں پوچھتے تک نہیں، ان کے گھرکے بارے میں معلومات حاصل نہیں کرتے اوران کی طرف دست تعاون دراز نہیں کرتے، کچھ پوچھنے والے یہ ضرورپوچھیں گے کہ سال بھرسے مدرسہ بندہے توکیسے چل رہاہے؟ لیکن ظاہرہے کہ اس سوال کاجواب ’’اللہ کاشکرہے‘‘ کے سواکچھ نہیں نکلتا، سوال کرکے خاموش رہنے والے ؛ بل کہ دل میں کچوکے لگانے والے توملتے ہیں؛ لیکن تعاون کرنے والے نہیں ملتے۔
کوروناکی اس مہاماری میں بہت ساری تنظیموں نے امدادی دروازے کھولے؛ لیکن وہاں کے لئے ، جہاں وہ تصاویرلے سکیں اوراخبارات وشوسل میڈیاز پرشیئر کرسکیں، اب یہ اساتذہ اتنے توبہرحال خوددارہیں کہ اس طرح کے تعاون سے دوررہتے ہیں اوراسی لئے ان کاتعاون نہیں ہوپاتا، اب ایسی صورت میں یاتووہ بھی خودداری کو بیچ کرنکل آئیں یاپھرمحتاجی کی زندگی گزاریں، ایسے حالات میں ہماری ملی تنظیمیں، جومصیبت اورآفت کے وقت بڑھ چڑھ کرحصہ لیتی ہیں اورجن کے پاس قوم کے روپے پیسے صدقات، عطیات اورزکات کے مدات کی شکل میں کافی مقدارمیں پہنچتے ہیں، قوم ان پراعتماد کرکے انھیں چندہ دیتی ہے، ان کوتوکم سے کم ان اساتذہ کا درد سمجھناچاہئے اوران کے لئے کوئی مشکل کام نہیں کہ ان کے نمائندے ہرعلاقہ؛ بل کہ ہرگاؤں میں ہیں، وہ ان اساتذہ تک براہ راست پہنچ سکتے تھے؛ لیکن افسوس! وہ بھی آج تک ان کے درد کوسمجھنے کے لئے تیار نہیں، اس پرجس قدرافسوس کیاجائے کم ہے۔
اب ان اساتذہ کی حالت بہت ہی خستہ ہے، ان کی حالت ایسی ہوگئی ہے کہ اپنے بچوں سے منھ چھپانا پڑرہاہے، بیوی کے سامنے جانے سے شکستگی کی کیفیت چھاجاتی ہے، کئی اساتذہ نے اپنادرددل بیان کیا، کئی نے اس پرمضامین لکھے؛ لیکن ابھی تک ان کی طرف توجہ نہیں دی گئی ہے، یہ اساتذہ ایسے بھی نہیں ہیں کہ کوئی تجارت شروع کرسکیں کہ پونچی اتنی ان کے پاس نہیں، کہیں مزدوری بھی نہیں کرسکتے کہ یہ کام کبھی کیاہی نہیں ہے، محلہ محلہ پھرکربھی کچھ بیچ نہیں سکتے کہ معاشرہ خود اسے پسند نہیں کرتا، ٹیوشن بھی نہیں کرسکتے کہ آج کل دینی تعلیم کے لئے ٹیوشن کون دلاناچاہتاہے؟ اوراگردلابھی دیں تومزدوری اتنی کم کہ استاذ سن کردل برداشتہ ہوجاتاہے، ایسے میں یہ کیاکریں؟ کہاں جائیں؟ بال بچوں کو کیسے پالیں؟ بیماری کاعلاج کس طرح کروائیں؟ آخریہ کیاکریں؟؟؟
ایسی صورت حال میں ملی تنظیموں کوان کی طرف متوجہ ہوناچاہئے اوران کاتعاون کرناچاہئے، اسی کے ساتھ معاشرہ میں صاحب مال ہیں، جن کے پاس اللہ کا دیابہت کچھ ہے، انھیں آگے آناچاہئے اوران جیسے اساتذہ کی خبرگیری کرنی چاہئے، ان کے بارے میں معلومات حاصل کرکے خاموشی کے ساتھ ان کاتعاون کرناچاہئے، یہ قوم کی اس وقت کی بڑی ذمہ داری ہے، اگریہ اساتذہ کسی اورکام سے جڑگئے، اورایک بڑی تعداد جڑبھی چکی ہے توآئندہ تعلیم دلانی بھی مشکل ہوجائے گی اورپھرامام وخطیب بھی ملنامشکل ہوسکتاہے؛ اس لئے خدارااس تعلق سے فکرکیجئے اوران اساتذہ کی بھرپورطریقے سے مددکیجئے، اللہ تعاون کرنے والوں کوبہترین اجردے گا۔
jamiljh04@gmail.com Mob: 8292017888

فلسطین: مسئلہ اورحل (تیسری اورآخری قسط)

 

فلسطین: مسئلہ اورحل

محمد جمیل اختر جلیلی ندوی

(قسط: ۳ ۔  آخری قسط)

اس وقت ہفتہ بھر جوجنگ چلی، وہ شیخ جراح کے علاقہ پرچلی، یہ ایک چھوٹاساقصبہ ہے، یہاں تقریباً پانچ سو فلسطینی آبادہیں، اب اسرائیلیوں کاکہناہے کہ وہ یہاں سے اپنے گھربارکوچھوڑیں اورکہیں اورجابسیں، ظاہرہے کہ اسے کیسے برداشت کیاجاسکتاہے؟ اورجوقومیں زندہ ہوتی ہیں، وہ توکبھی بھی اسے برداشت نہیں کرسکتیں، خبروں کے مطابق اس جنگ میں حماس کی طرف سے راکٹ بھی داغے گئے، یعنی غلیل اورپتھرسے شروع ہونے والی جنگ اب راکٹ تک پہنچ چکی ہے، اس کے جواب میں اسرائیل نے وہی طریقہ اختیارکیا اورنہتے فلسطینیوں اوران کے رہائشی علاقوں پربم باری کی، ہونا تویہ چاہئے کہ اسرائیل کے اس حملہ کے خلاف پوری دنیا اٹھ کھڑی ہوتی؛ لیکن ظاہرہے کہ ایسا ممکن نہیں ہے، کم از کم عربوں کوتواپنے فلسطینی بھائیوں کی امدادکرنی ہی چاہئے کہ وہ عرب ہی ہیں اورگزشتہ دہائیوں میں قومیت عربیہ کانعرہ بھی لگایا گیاتھا(جوسراسر اسلامی تعلیم کے خلاف تھا)؛ لیکن پتہ نہیں اس وقت وہ قومیت عربیہ کانعرہ کہاں دم توڑچکاہے کہ اپنے عربی بھائیوں کوبموں کے سائے میں چھوڑ کرآرام دہ ایئرکنڈیشن روم میں دادعیش دیاجارہاہے۔
اب سوال یہ ہے کہ اس مسئلہ کاحل کیاہوگا؟ کیایہ قابل حل ہے؟ اگرہے توپھروہ لوگ کیوں آگے نہیں بڑھ رہے ہیں، جوہیومن رائٹس کی باتیں کرتے ہیں؟اس طرح کی خوفناک جنگ کب تک جاری رہے گی اور انسانیت تباہ وبرباد ہوتی رہے گی؟ اس مسئلہ کاحل ہوناچاہئے اوراس کاایک حل تویہ ہے کہ جس برطانیہ نے اسرائیل کی ریاست کوجنم دیاہے، وہ اپنے اس بیٹے کواپنے ملک میں لے جاکربسائے، اگر ایسا ہوگیا تو معاملہ فوری طورپرختم ہوجائے گا؛ لیکن ظاہرہے کہ ایساممکن نہیں ہے اورنہ یہ اتنا آسان ہے کہ ایک ریاست کے وجود میں آنے کےسترسال بعد اسے ختم کردیاجائے اوردنیاکے نقشہ سے مٹادیاجائے، وہ بھی اس وقت، جب کہ عالمی طاقتیں اس کی پشت پرہوں، اگریہ ہونا ہوتاتو1967 ء میں ہی ہوگیاہوتا؛ لیکن افسوس ! یسا نہیں ہوسکا۔
دوسراحل، جوآسان بھی ہے اورقابل عمل بھی کہ 1948ء میں جتنے رقبہ پراس ناجائزریاست کو بسایا گیا تھا، اسرائیل کواتنے پرہی محدود کیاجائے(یہ بھی اگرچہ ناقابل برداشت ہے؛ لیکن اہون البلیتین کے تحت بادل ناخواستہ برداشت کیا جائے گا) ، اگریہ ہوجائے گا تومسئلہ آسانی کے ساتھ ختم ہوجائے گا، لیکن ’’بلی کے گلے میں گھنٹی باندھے کون؟‘‘، یہ کام کون کرے گا؟ ظاہرہے کہ اس کے لئے عالمی برادری کوہی پیش رفت کرنی ہوگی؛ لیکن عالمی برادری مسلم دشمنی اوراسرائیل دوستی کی وجہ سے ایساکرنہیں سکتی، نیز اس لئے بھی وہ ایسا نہیں کرسکتی کہ ان کے ہاتھ خود اس قسم کی حرکتوں سے خون آلود ہیں؛ اس لئے اب تیسراحل یہ ہے کہ عرب ممالک یک جٹ ہوکر عالمی برادری پردباؤ بنائیں کہ وہ یہ کام کریں، عرب ممالک اگرچاہیں توایسا یقینا ہوجائے گا؛ لیکن افسوس کے ساتھ کہنا پڑرہاہے کہ عرب ممالک کو فلسطین کے مسئلہ سے دلچسپی ہی نہیں ہے، انھیں اپنی کوٹھیاں عزیزہیں، اپنی عیش بھری زندگی کووہ تجنا نہیں چاہتے، ان کاعمل’’شیخ، اپنی دیکھ‘‘ پر ہے؛ لیکن ظاہرہے کہ اگریہ فلسطینیوں کاساتھ نہیں دیں گے اور فلسطین اگرپورے کاپورا اسرائیل کے ہاتھ میں چلا گیا تو پھرشام ، عراق، اردن، لبنان اورمصروغیرہ بھی محفوظ نہیں رہ سکیں گے اورپھرآخرمیں سعودی عرب کی باری آئے گی اوراس وقت ان کواسی طرح کے جملے سننے کو ملیں گے، جس طرح کے جملے ہلاکوخان نے معتصم باللہ کوسنایاتھاکہ خزانہ جمع کرنے کی کیاضرورت تھی؟ کوٹھیاں بنانے کی ضرورت تھی؟ سونے کی گاڑیاں بنوانے کی کیاضرورت تھی؟ اونچی اونچی عمارتیں بناکرگنیز بک آف ورلڈ میں ریکارڈ بنوانے کی کیاضرورت تھی؟سمندرکے اندر بستیاں بسانے کی ضرورت کیاتھی؟ تمہارے پاس جتنی دولت تھی، اس سے تم پوری دنیاپرفتح حاصل کرسکتے تھے، جدید ہتھیاربناسکتے تھے، خرید سکتے تھے،اس کے ذریعہ سے سائنس اورٹیکنالوجی کی بڑی سی بڑی یونیورسیٹیاں بناسکتے تھے، جہاں اپنی حفاظت کے لئے عمدہ سے عمدہ قسم کے ہتھیاربنائے جاسکتے تھے، تمہارے پاس اتنی دولت تھی کہ تم ہتھیاربناتے اور دنیا انھیں خرید تی،تمہارے پاس اتنی دولت تھی کہ بادشاہوں کوخرید سکتے تھے، ایسانہ کرنے کاانجام اب بھگتو، کاش! اب بھی عربوں کوسمجھ میں آجائے!!!
اب سوال یہ ہے کہ اس مسئلہ کاحل کیاہوگا؟ کیایہ قابل حل ہے؟ اگرہے توپھروہ لوگ کیوں آگے نہیں بڑھ رہے ہیں، جوہیومن رائٹس کی باتیں کرتے ہیں؟اس طرح کی خوفناک جنگ کب تک جاری رہے گی اور انسانیت تباہ وبرباد ہوتی رہے گی؟ اس مسئلہ کاحل ہوناچاہئے اوراس کاایک حل تویہ ہے کہ جس برطانیہ نے اسرائیل کی ریاست کوجنم دیاہے، وہ اپنے اس بیٹے کواپنے ملک میں لے جاکربسائے، اگر ایسا ہوگیا تو معاملہ فوری طورپرختم ہوجائے گا؛ لیکن ظاہرہے کہ ایساممکن نہیں ہے اورنہ یہ اتنا آسان ہے کہ ایک ریاست کے وجود میں آنے کےسترسال بعد اسے ختم کردیاجائے اوردنیاکے نقشہ سے مٹادیاجائے، وہ بھی اس وقت، جب کہ عالمی طاقتیں اس کی پشت پرہوں، اگریہ ہونا ہوتاتو1967 ء میں ہی ہوگیاہوتا؛ لیکن افسوس ! یسا نہیں ہوسکا۔
دوسراحل، جوآسان بھی ہے اورقابل عمل بھی کہ 1948ء میں جتنے رقبہ پراس ناجائزریاست کو بسایا گیا تھا، اسرائیل کواتنے پرہی محدود کیاجائے(یہ بھی اگرچہ ناقابل برداشت ہے؛ لیکن اہون البلیتین کے تحت بادل ناخواستہ برداشت کیا جائے گا) ، اگریہ ہوجائے گا تومسئلہ آسانی کے ساتھ ختم ہوجائے گا، لیکن ’’بلی کے گلے میں گھنٹی باندھے کون؟‘‘، یہ کام کون کرے گا؟ ظاہرہے کہ اس کے لئے عالمی برادری کوہی پیش رفت کرنی ہوگی؛ لیکن عالمی برادری مسلم دشمنی اوراسرائیل دوستی کی وجہ سے ایساکرنہیں سکتی، نیز اس لئے بھی وہ ایسا نہیں کرسکتی کہ ان کے ہاتھ خود اس قسم کی حرکتوں سے خون آلود ہیں؛ اس لئے اب تیسراحل یہ ہے کہ عرب ممالک یک جٹ ہوکر عالمی برادری پردباؤ بنائیں کہ وہ یہ کام کریں، عرب ممالک اگرچاہیں توایسا یقینا ہوجائے گا؛ لیکن افسوس کے ساتھ کہنا پڑرہاہے کہ عرب ممالک کو فلسطین کے مسئلہ سے دلچسپی ہی نہیں ہے، انھیں اپنی کوٹھیاں عزیزہیں، اپنی عیش بھری زندگی کووہ تجنا نہیں چاہتے، ان کاعمل’’شیخ، اپنی دیکھ‘‘ پر ہے؛ لیکن ظاہرہے کہ اگریہ فلسطینیوں کاساتھ نہیں دیں گے اور فلسطین اگرپورے کاپورا اسرائیل کے ہاتھ میں چلا گیا تو پھرشام ، عراق، اردن، لبنان اورمصروغیرہ بھی محفوظ نہیں رہ سکیں گے اورپھرآخرمیں سعودی عرب کی باری آئے گی اوراس وقت ان کواسی طرح کے جملے سننے کو ملیں گے، جس طرح کے جملے ہلاکوخان نے معتصم باللہ کوسنایاتھاکہ خزانہ جمع کرنے کی کیاضرورت تھی؟ کوٹھیاں بنانے کی ضرورت تھی؟ سونے کی گاڑیاں بنوانے کی کیاضرورت تھی؟ اونچی اونچی عمارتیں بناکرگنیز بک آف ورلڈ میں ریکارڈ بنوانے کی کیاضرورت تھی؟سمندرکے اندر بستیاں بسانے کی ضرورت کیاتھی؟ تمہارے پاس جتنی دولت تھی، اس سے تم پوری دنیاپرفتح حاصل کرسکتے تھے، جدید ہتھیاربناسکتے تھے، خرید سکتے تھے،اس کے ذریعہ سے سائنس اورٹیکنالوجی کی بڑی سی بڑی یونیورسیٹیاں بناسکتے تھے، جہاں اپنی حفاظت کے لئے عمدہ سے عمدہ قسم کے ہتھیاربنائے جاسکتے تھے، تمہارے پاس اتنی دولت تھی کہ تم ہتھیاربناتے اور دنیا انھیں خرید تی،تمہارے پاس اتنی دولت تھی کہ بادشاہوں کوخرید سکتے تھے، ایسانہ کرنے کاانجام اب بھگتو، کاش! اب بھی عربوں کوسمجھ میں آجائے!!!

فلسطین: مسئلہ اورحل (قسط: ۲)

 

فلسطین: مسئلہ اورحل

محمد جمیل اختر جلیلی ندوی

(قسط: ۲)

اگربات یہیں پرختم ہوجاتی توشایدعرب فلسطینی آنسوبہاکرکچھ سالوں کے بعد خاموش ہوبیٹھتے؛ لیکن اسرائیلیوں نے اس حدپراکتفانہیں، جتنی زمین پر ریاست اسرائیل کوقائم کرکے یہودیوں کے حوالہ کیاگیا، انھوں نے اپنی سرحدوں کووسیع کرناشروع کردیا، جس کا خطرہ اردن، مصراورشام نے محسوس کیا، لہٰذا ان لوگوں نے اپنی سرحدوں پرفوجیں تعینات کردیں، جس کے نتیجہ میں چھوٹی موٹی چھڑپیں اسرائیل کے ساتھ ہوتی رہتی تھیں، ایک بڑی جنگ عربوں اوراسرائیل کے درمیان 1967ء میں ہوئی، جس میں مصر، عراق، اردن اورشام کومل کراسرائیل پرحملہ کرناتھا، ان کے جہاز اڑنے کے لئے ایئر بیس پرتیارتھے؛ لیکن قبل اس کے کہ وہ اڑتے، اسرائیل کے بمبارطیاروں نے ان کو تباہ وبربادکردیااوراسرائیل کو اس میں بڑی کامیابی ملی، جس کی وجہ سے اس کا سینہ چھپن انچ کاہوگیااورپھراس نے اردن، شام اورمصرتمام ممالک سے کچھ نہ کچھ زمینیں چھین لیں، پھر1973ء میں ایک اورجنگ ہوئی دونوں کے مابین؛ لیکن اس میں اسرائیل کوپہلے کی طرح کامیابی نہیں ملی، عربوں نے بھی اپنی بعض ان زمینوں کو واپس لے لیا، جن کو اسرائیل نے چھین لیا تھا۔
اس جنگ کے بعداسرائیل نے امریکہ کے توسط سے اپناطریقۂ کاربدل دیا اور سیاسی بات چیت کی طرف قدم بڑھایا، اس تعلق سے پہلی کامیابی اس وقت ملی، جب  مصر سے یہ طے ہوگیا کہ صحرائے سینا، جسے اسرائیل نے چھین لیاتھا، اسے واپس کردیاجائے گا، اس کے بدلہ میں مصراسرائیل کوایک ریاست کے طور پر تسلیم کرلے، اس کامیابی کو ’’کیمپ ڈیوڈ اگریمنٹ‘‘ (Camp David Agreement)کے نام سے جاناجاتاہے،یہ انورسادات کے زمانہ میں 17؍دسمبر1978ء میں یہ اگریمنٹ ہوا، اس میں بھی اسرائیل نے چالاکی کی اورپورے صحرائے سینادینے کی بجائے صرف مشرقی حصہ ان کے حوالہ کیا اورمغربی حصہ کواپنے ہی پاس رکھا، اس کے بعدایک ایک کرکے ان تمام عربوں کوفلسطینیوں کے تعاون سے کاٹ لیا، جوان کی مددکیاکرتے تھے اور گزشتہ سالوں میں تواس تعلق سے حدہی پارکردی گئی،کئی خلیجی ملکوں نے بھی اسے تسلیم کرلیا۔
کیمپ ڈیوڈ اگریمنٹ کی کامیابی کے بعد دیگروہ لوگ بھی جب فلسطینیوں کے تعاون سے پیچھے ہٹ گئے ، جوان کے شانہ بہ شانہ کھڑے تھے توفلسطینی یہ سمجھ گئے کہ اپنی زمین کی حفاظت کے لئے اب جوکچھ بھی کرناہے، خود ہی کرناہے، اس کے لئے کئی گروپ وجود میں آئے، جن میں سے ایک یاسرعرفات کی ’’الفتح‘‘ بھی تھی، ابتدا میں تواس نے کچھ کام کیا؛ لیکن بعد میں یہ جماعت بالکل ناکارہ ہوکررہ گئی اور13؍ستمبر1993ء میں اسرائیل اوریاسرعرفات کے درمیان ’’اوسلو‘‘ معاہدہ کے ہونے کے بعدتووہ امریکہ کے ہی پٹھوہوکررہ گئی تھی، جس کی وجہ سے دوسری تحریک شروع ہوئی، شیخ احمدیاسین نے فلسطینیوں کے سرد پڑتے ہوئے جذبوں کوحوصلہ دیا،ان کو 1987ء میں اس وقت عالمی شہرت حاصل ہوئی، جب وہ انتفاضہ اول کے وقت سامنے آئے، اس وقت فلسطینی اسلامی تحریک نے ’’حماس‘‘کانام اختیارکیا، ان کانظریہ یہ تھا کہ اگرہمارے پاس ہتھیارنہیں ہیں تو کیاہوا؟ ہمارے پاس پتھرہیں، ہم وہی ماریں گے، غلیل ہیں، ان سے حملہ کریں گے اورپھرزمانہ نے دیکھا کہ ایک طرف اسرائیل کی بکتربندگاڑیاں ہوتیں اوردوسری طرف لوگوں کے ہاتھ میں پتھرہوتے اوروہ ان سے بکتربندگاڑیوں پرحملہ کرتے، اس طریقہ سے ظاہرہے کہ جدید دورکے ہتھیارسے لیس اسرائیلیوں سے جنگ جیتی نہیں جاسکتی ہے؛ لیکن دراصل اس کے ذریعہ سے انھوں نے عالمی برادری کویہ جتلایا اوران کی سوئی ہوئی ضمیرکوجگانے کی کوشش کی کہ ہم نہتے لوگ ہیں، ہمارے پاس کسی قسم کاہتھیارنہیں ہے، ہم ظالم نہیں ہے، ہم دہشت گرد نہیں ہیں، جیسا کہ یہودی نژاد عالمی ہمیں بناکر پیش کررہا ہے؛ بل کہ ہم مظلوم ہیں، ہم تو اپنا دفاع بکتربندگاڑیوں کے مقابلہ میں پتھر سے کررہے ہیں، اگرہم ظالم ہوتے توہمارے پاس بھی ہتھیارہوتے، ظالم وہ لوگ ہیں، جوہم پرہتھیارلے کرچڑھ آئے ہیں؛ لیکن عالمی برادری کاضمیرمردہ ہوچکا تھا، یاپھروہ لوگ جاگتے ہوئے بھی سونے کاناٹک کررہے تھے، جس کی وجہ سے اس پیغام کونظرانداز کردیا گیا اورالٹے فلسطینیوں پرہنسنے لگے کہ یہ پاگل ہیں، بکتربندگاڑیوں اورٹینکوں کامقابلہ پتھر اورغلیل سے کررہے ہیں۔
اس کے بالمقابل اسرائیل کیاکررہاہے؟ ایک تووہ ہتھیارسے لیس ہے اوروہ بھی جدیدترین ہتھیارسے، پھراس کے ساتھ وہ صرف ان لوگوں پرحملہ آور نہیں ہو رہا ہے، جوان کے ساتھ مقابلہ کررہے ہیں؛ بل کہ نہتے لوگوں پروہ بموں کی بارش کررہاہے، عمارتیں تباہ کررہاہے، پوری پوری پستیوں کووہ اجاڑتا جارہاہے، صابرہ اورشتیلہ ، جودومہاجرفلسطینیوں کے پناہ گزین کیمپ تھے، جن کے پاس چاقونام کی چیز بھی نہیں تھی، ان دونوں کیمپوں پربم گراگروہاں کے تمام پناہ گزینوں کوختم کردیا، اسے توظلم اوربربریت سے ہی تعبیرکریں گے، اسی کے ساتھ ساتھ اسرائیلی فلسطینیوں کوان کے اپنے ذاتی گھروں سے بھگاتارہاہے اوران کی زمینوں پرقبضہ کرتارہاہے، یہی وجہ ہے کہ جس وقت اسرائیل کاوجودہواتھا، اس وقت (1948ء) اس کارقبہ7,993مربع میل یعنی 12,863کلومیٹرتھا، جب کہ آج اس کے پاس 13,760 مربع میل یعنی 22,145کلومیٹرسے بھی زیادہ ہے، نقشہ کودیکھ کر اس کااندازہ لگایاجاسکتاہے کہ وجود کے وقت اس کانقشہ کیساتھا اورآج کیساہے؟ یہ رقبہ اسے کہاں سے حاصل ہوا؟ نہتے فلسطینیوں کودربدراوربے گھرکرکے، اب خود ہی فیصلہ کیاجائے کہ فلسطینی اپنی زمین کے لئے مزاحمت کریں گے یانہیں؟ اوراس مزاحمت میں وہ مظلوم ہیں یاظالم؟

(جاری ۔۔۔۔۔۔۔۔۔۔۔۔۔)

فلسطین: مسئلہ اورحل (قسط:۱)

فلسطین: مسئلہ اورحل

محمد جمیل اختر جلیلی ندوی

(قسط: ۱)

اگرآپ کسی کے ہاتھ اپنی زمین کاایک ٹکڑا بیچیں اوروہ شخص خریدکی ہوئی زمین کی بجائے اس حصہ پربھی قبضہ کرلے، جوآپ نے اس کے ہاتھوں بیچی نہیں ہے توآپ کارویہ اس شخص کے ساتھ کیارہے گا؟آپ اپنی زمین پراسے قبضہ کرنے دیں گے یااپنی زمین کی حفاظت کے لئے تگ ودو کریں گے؟ اوراگروہ شخص آپ کی تمام زمینوں کوہتھیا لینا چاہے توپھرآپ کیاکریں گے؟ اسے طاقت ورسمجھ کرچپ ہوجائیں گے اوراپنی زمین وجائیداد؛ بل کہ اپنے رہائشی مکانات سے دست برداری اختیارکرلیں گے یاممکن حد تک اپنی زمینوں کی حفاظت کی کوشش کریں گے؟پھراس کوشش میں آپ ظالم اورمفسد کہلائیں گے یامظلوم اورمجبور؟
اگراس سوال کاجواب آپ کومل جائے توفلسطین اور اسرائیل کے مابین جاری جنگ میں بھی ظالم ومظلوم کی پہچان کرلیں گے اورذہن کے پردہ میں ابھرتے ہوئے اس سوال کاجواب بھی مل جائے گاکہ ٹینک وبکتربندگاڑیوں کامقابلہ پتھر اورغلیل سے کیوں کیاجاتاہے؟ لیکن پوری طرح سے اس مسئلہ کوسمجھنے کے لئے 1914ء سے شروع ہوئی تاریخ کی ورق گردانی کرنی ہوگی۔
1914ء میں پہلی جنگ عظیم شروع ہوگئی تھی، جس میں ایک طرف الائنس(Alliance)طاقتیں( امریکہ، برطانیہ، روس ، فرانس اوراٹلی وغیرہ )شامل تھیں، جب کہ دوسری طرف (Ottoman Empire) جرمنی اورعثمانی سلطنت تھے، اس جنگ میں جرمنی اورعثمانی سلطنت کاپلڑابھاری تھا، اس جنگ کے مغربی محاذ(یعنی شام اورترکی وغیرہ کے علاقوں)کوترک فوجوں نے سنبھال رکھاتھا، جب کہ عراق وغیرہ کے علاقوں میں عرب فوجیں برسرپیکارتھیں، ترک کواس زمانہ میں ’’مردبیمار‘‘ کہاجاتاتھا؛ لیکن اس کے باوجود انھوں سال بھر کی لڑائی میں الائنس کے دانت کھٹے کردئے تھے، ترک فوجوں نے Dardanelles, Gallipoliاورقلعہ چناق میں عظیم الشان کامیابیاں حاصل کیں، جن کودیکھ کربرطانیہ اورالائنس طاقتوں نے اندازہ لگالیاکہ اس طرح ان لوگوں سے جنگ جیتنابہت مشکل ہے، لہٰذا انھوں نے اپنی شرست کے مطابق عربوں کوترکوں سے بھڑانے کافیصلہ کیا اوراس کے لئے انھوں نے عربوں کے سامنے ’’عرب نیشیلزم‘‘(قومیت عربیہ) کا صور پھونکا، اس کے لئے T.E. Lawrence(جوبرطانیہ افواج کاایک معروف افسرتھا) کا انتخاب عمل میں آیا، اس نے پہلے ترک پارلیمنٹ کے رکن سلیمان فائزی کوغداری پرابھارنے کے لئے خطیررقم کی پیش کش کی، جسے اس نے ٹھکرادیا اوردھکے مارکرلارنس کواپنے یہاں سے نکلوادیا، یہ دیکھ کراس نے عرب کارخ کیا اوربصرہ کو اپنا ہدف بنایا، اسلامی لباس پہن کراس نے اسلام قبول کرنے کاڈھونگ کیا اورعوام میں مقبولیت حاصل کرنے کے لئے وہاں کے بدوؤں میں ماہانہ دولاکھ پونڈ تک تقسیم کرناشروع کیا، یہ اس وقت کی بات ہے، جب پٹرو ڈالرکاآغاز نہیں ہواتھا؛ اس لئے عوام بہ آسانی اس کے دام فریب میں آگئے اوراس طرح اس نے مکہ کے گورنرحسین ہاشمی تک رسائی حاصل کی، اس سے بات چیت کی اور حکومت کالالچ دیتے ہوئے اس نے حسین شریف مکہ سے یہ کہاکہ اگرآپ اس جنگ میں ترکوں کے خلاف ہمارا ساتھ دیں توہم جنگ جیتنے کے بعد عرب علاقوں کے اندرآپ کی ایک آزادریاست بنادیں گے اورآپ کووہاں کابادشاہ بنادیں گے، ان کے مابین جوبات چیت ہوئی،وہThe Hussein-McMahon Correspondence-1915/16  نام سے معروف ہے، پھرجون 1916ء میں شریف مکہ کے بیٹے امیرفیصل اورلارنس کی کمان میں عرب فوجیں عراق کی طرف پہنچ گئیں اوربرطانیہ کے ساتھ مل کرترکوں کے خلاف لڑائی میں شامل ہوگئیں، جس کے نتیجہ میں ترکوں کوشکست ہونے لگی۔
دوسری طرف 1917ء میں روس اپنے ملکی حالات کے وجہ سے جنگ سے پیچھے ہٹ گیا، جس کودیکھ شام وفلسطین کے محاذ پرموجودترکی کمانڈرانورپاشااپنی فوج کاایک حصہ لے کرکوہ قاف کی طرف بڑھا؛ تاکہ روس کے پیچھے ہٹنے سے جوکمزوری آئی ہے، اس کافائدہ اٹھایاجاسکے ؛ لیکن اس کی وجہ سے سب سے بڑا نقصان یہ ہواکہ شام کے علاقوں میں برطانیہ کی افواج کاپلڑابھاری ہوگیا؛ چنانچہ اس نے نومبر 1917ء کوغزہ(Gaza)پراوردسمبر1917ء میں یروشلم اور بیت المقدس پرقبضہ کرلیا اور1918ء میں شام کے دیگر علاقے، فلسطین،لبنان، حلب اورحمص وغیرہ علاقے برطانیہ افواج زیرنگین آگئے۔
یہ بات بھی ذہن میں رہنی چاہئے کہ جنگ عظیم اول کے دوران (مئی 1916ء) ہی برطانیہ اورفرانس کے مابین ایک خفیہ معاہدہ ہواتھا، جسے The Secret Sykes-Picot Agreement کہاجاتاہے، جس کی روسے علاقے تقسیم کئے گئے تھے کہ جنگ جیتنے کے بعدفلاں فلاں علاقے برطانیہ کے پاس رہیں گے اورفلاں فلاں علاقے فرانس کے پاس، فلسطین پردونوں کی نظرتھی؛ اس لئے معاملہ کے حل کے لئے یہ کہاگیا ہم فلسطین کوایک آزادعلاقہ کے طورپرباقی رکھیں گے، یہ معاہدہ برطانیہ کی خست اورخباثت کی اعلیٰ مثال ہے؛ کیوں کہ ایک طرف تواس نے شریف مکہ سے یہ کہاکہ ترکوں کے خلاف جنگ کے نتیجہ میں ہم عرب کی بادشاہت آپ کے سپردکریں گے، جب کہ خفیہ طورپربرطانیہ اپنے حلیف فرانس کے ساتھ مل کریہ معاہدہ کررہاہے کہ جنگ جیتنے کے بعدعرب کے فلاں علاقے آپ کے ہوں گے اورفلاں علاقے ہمارے، دوسری طرف یہودیوں کوبھی یہ لالچ دیتے رہے کہ اگرہم جیت جائیں گے توفلسطین میں یہودیوں کی ایک ریاست بنادیں گے؛ چنانچہ برطانیہ کے وزیر خارجہ جیمس بالفورنے 2؍نومبر1917ء کوصہیونی تنظیم کے نمائندہ Lord Rothschild  کوایک خط لکھا، جس میں یہ بات واضح کی کہ حکومت برطانیہ  پوری ذمہ داری کے ساتھ فلسطین میں یہودیوں کی آباد کاری کاارادہ رکھتی ہے، یہی وہ خط ہے جس کی بنیاد پراسرائیل کی ریاست قائم ہوئی۔
بہرحال! اپنوں کی دغابازی کی وجہ سے اتحادی افواج نے جنگ جیت لیااورSykes-Picot Agreementکے معاہدہ کے برخلاف برطانیہ نے فرانس کواس بات پرراضی کرلیا کہ فلسطین کوبرطانیہ کے ماتحت ہی رہنے دیاجائے، برطانیہ نے فلسطین میں اپناہائی کمشنر قائم کیا، جس کوتمام طرح کے اختیارات حاصل تھے، اس نے یہودیوں کو اس بات کی اجازت دی اگرآپ یہاں آکرآبادہوناچاہتے ہیں تویہاں کے باشندوں سے یہاں کی زمینیں خرید سکتے ہیں، انھیں کاشت کاری کے لئے قرضے اوردیگرسہولیات بھی فراہم کیاگیا، جب کہ دوسری طرف عربوں پربھاری ٹیکس لگائے گئے اورٹیکسوں کی وصولی کے بہانے پر عدالتوں نے زمینیں ضبط کرنے کے فیصلے صادر کئے، ضبط شدہ زمینیں یہودیوں کے ہاتھوں فروخت کی گئیں، نیز سرکاری زمینوں کے بڑے بڑے رقبے بھی کہیں مفت اورکہیں معمولی قیمتوں پریہودیوں کودئے گئے، بعض مقامات پرحیلے بہانے سے پورے عرب گاؤں کا صفایا کردیا گیااوروہاں یہودی بستیاں بسادی گئیں، اس طرح یہودیوں کی تعدادمیں روزبروز اضافہ ہوتاگیا، 1922ء میں وہ 82؍ہزار سے کچھ زائد تھے، 1936جب کہ ء میں ان کی تعداد ساڑھے چارلاکھ کے قریب پہنچ گئی۔
جنگ عظیم سے پہلے فلسطین میں جویہودی آباد تھے، ان کے پاس فلسطین کی 11%زمین تھی اورباقی 89%عرب فلسطینیوں کے پاس تھی؛ لیکن تیس سالوں کی کوشش اورمحنت سے یہودیوں کے پاس فلسطین کی 55%زمین چلی گئی، پھردوسری جنگ عظیم(1939-1945ء) کی وجہ سے فلسطین میں یہودیوں کی آبادی کابے حد اضافہ ہوگیا؛ کیوں کہ ہٹلرنے جرمنی سے ان کامکمل صفایاکرناشروع کردیاتھا، جس کی وجہ سے وہ لوگ بھاگ بھاگ کروہاں پناہ گزین ہوگئے، جس کی وجہ سے زمینی تبدیلی کے ساتھ ساتھ آبادی کاتناسب بھی مکمل طور پربدل گیااور یہودیوں کی رہائش کے لئے تہتر(73)نئی بستیاں بسائی گئیں، اس صورت حال کودیکھ کر فلسطینی پریشان ہوئے اوراس کی وجہ سے وقتاً فوقتاً جھگڑے بھی ہونے لگے، آہستہ آہستہ یہ جھگڑے خوفناک ہوتے گئے۔
اسرائیلی اورفلسطینیوں کے درمیان رونماہونے والے فسادات کودیکھ کرامریکہ اوربرطانیہ نے ایک رائل کمیشن قائم کی، جس نے صورت حال کاجائزہ لے کربتایاکہ اسرائیلی ظلم کرتے ہوئے فلسطینیوں کودبانے کی کوشش کرتے ہیں، جس کے نتیجہ میں یہ فسادات رونماہوتے ہیں، یہ بات بھی کہی گئی کہ اس مسئلہ کاحل بس یہ ہے کہ دوریاستیں قائم کردی جائیں، ایک اسرائیلیوں کے لئے اوردوسری فلسطینیوں کے لئے، جس کواسرائیلی اورفلسطینی دونوں نے رد کردیا، پھراسرائیلی اورفلسطینی دونوں کی طرف سے اپنے اپنے تحفظ کے لئے مزاحمتی جماعتیں قائم ہونے لگیں، جن کے درمیان ٹکراؤبھی کافی خوفناک ہوتا تھا، ان سب چیزوں سے برطانیہ کافی پریشان تھا ؛ چنانچہ جیسے ہی تیس سالہ معاہدہ اس کاختم ہوا، اس نے وہاں سے اپنے جانے کافیصلہ کیا؛ لیکن خاموشی کے ساتھ چلے نہیں گئے؛ بل کہ فلسطین کے امن کوغارت کرنے کے لئے 14؍مئی1948ء کورات کے دس بجے اسرائیلی ریاست کے وجود کااعلان کردیا، اس کوقبول بھی کرلیا، امریکہ نے بھی قبول کیا اوران کے جوحلیف ممالک تھے، ان میں بہتوں نے اس کوقبول کرلیا، پھریہ قراداداقوام متحدہ میں پیش کیاگیااوروہاں بھی اسے تسلیم کرلیاگیا؛ لیکن عربوں کویہ تسلیم نہیں تھا۔

(جاری ۔۔۔۔۔۔)